अखेर आज यूपीएससी परीक्षेचा निकाल जाहीर; शक्ती दुबे देशात पहिली..

उद्रेक न्युज वृत्त :-भारतातील सर्वात कठीण परीक्षा म्हणजे केंद्रीय लोकसेवा आयोगाची परीक्षा म्हणजेच यूपीएससी.परीक्षा पास होण्यासाठी विद्यार्थी जीवाचे रान करून नशीब अजमावू पाहतात.यंदाच्या यूपीएससी २०२४ चा निकाल आज,मंगळवारी २२ एप्रिलला जाहीर करण्यात आला असून यंदाच्या यूपीएससी परीक्षेत उत्तरप्रदेशच्या प्रयागराज येथील शक्ति दुबे हिने देशात पहिला क्रमांक पटकावला आहे,तर हर्षिता गोयल देशात दुसरी तर महाराष्ट्राच्या पुणे येथील अर्चित डोंगरे याने देशात तिसरा क्रमांक पटकावत बाजी मारली आहे. केंद्रीय लोकसेवा आयोगाने (UPSC) २०२४ च्या नागरी सेवा परीक्षामध्ये नियुक्तीसाठी एकूण १,००९ उमेदवारांची निवड केली आहे.या उमेदवारांना भारतीय प्रशासकीय सेवा (IAS),भारतीय परराष्ट्र सेवा (IFS),भारतीय पोलिस सेवा (IPS) आणि इतर केंद्रीय सेवा (गट अ आणि ब) या पदांवर नियुक्त केले जाईल.निवडलेल्या उमेदवारांमध्ये विविध श्रेणीतील उमेदवारांचा समावेश आहे,ज्यामध्ये सामान्य श्रेणीतील ३३५,आर्थिकदृष्ट्या दुर्बल घटकातील (EWS), ३१८ इतर मागासवर्गीय (OBC),१६० अनुसूचित जाती (SC) आणि ८७ अनुसूचित जमाती (ST) यांचा समावेश आहे.तर दिव्यांग श्रेणीतून ४५ उमेदवारांची निवड करण्यात आली आहे.यूपीएससी नागरी सेवा परीक्षेचा अंतिम निकाल आज,मंगळवारी जाहीर झाला असून निकाल पाहण्यासाठी उमेदवारांनी यूपीएससीची अधिकृत वेबसाइट upsc.gov.in ला भेट द्यावी.