आज चंद्राच्या लख्ख प्रकाशाची अनुभूती देणारी कोजागरी पौर्णिमा..

उद्रेक न्युज वृत्त :-धार्मिक श्रद्धा,कौटुंबिक स्नेह आणि सांस्कृतिक परंपरांचा संगम असलेल्या शरद ऋतूच्या प्रसन्न वातावरणात चंद्राच्या लख्ख प्रकाशाची अनुभूती देणारी कोजागरी पौर्णिमा आज,रविवार २५ ऑक्टोंबरला सर्वत्र साजरी केली जाणार आहे.या उत्सवानिमित्त घरोघरी लक्ष्मीपूजन,चंद्रदर्शन,मसाला दूध आणि जागरणाची तयारी सुरू असून बऱ्याच ठिकाणी विविध सामाजिक व धार्मिक संघटनांकडून सांस्कृतिक कार्यक्रमांचे आयोजन केले जात आहे.

आश्विन महिन्यातील पौर्णिमेला कोजागरी किंवा शरद पौर्णिमा म्हटले जाते.काही भागांत या दिवसाला कौमुदी पौर्णिमा असेही संबोधले जाते. ‘को जागर्ति?’ म्हणजे ‘कोण जागे आहे?’ या संस्कृत प्रश्नावरून कोजागरी हे नाव प्रचलित झाल्याची धार्मिक मान्यता आहे.या रात्री देवी लक्ष्मी पृथ्वीवर संचार करून जागरण करणाऱ्या भक्तांना आशीर्वाद देते,अशी श्रद्धा आहे.कोजागरी म्हटले की केशर,बदाम,पिस्ते,वेलची आणि सुकामेवा घालून तयार केलेल्या मसाला दुधाची आठवण होते.महाराष्ट्रात हे दूध चंद्रप्रकाशात ठेवून नंतर प्रसाद म्हणून ग्रहण करण्याची परंपरा आहे. काही ठिकाणी तांदळाची खीरही चंद्राला अर्पण केली जाते.चंद्राच्या किरणांत अमृततुल्य गुण असतात, अशी धार्मिक धारणा या प्रथेमागे आहे. शरद पौर्णिमेचा चंद्र सोळा कलांनी परिपूर्ण असतो,अशीही पारंपरिक मान्यता आहे.या रात्री चंद्रदर्शन आणि जागरणाला धार्मिक महत्त्व दिले जाते.मात्र, चांदण्यात ठेवलेल्या दुधामुळे विशिष्ट आजार बरे होतात किंवा त्याला विशेष औषधी गुण प्राप्त होतात,याला ठोस वैज्ञानिक पुरावा नाही.दूध किंवा खीर प्रसादासाठी ठेवतांना  धूळ,कीटक आणि इतर दूषित घटकांपासून संरक्षण करणे आवश्यक आहे.दूध जास्त वेळ उघड्यावर न ठेवता सुरक्षित तापमानात साठविण्याची काळजी घ्यावी.परंपरेनुसार काही भाविक दिवसभर उपवास करून रात्री लक्ष्मी आणि इंद्राचे पूजन करतात. पूजेनंतर चंद्राला दूध किंवा खिरीचा नैवेद्य दाखविला जातो.घरांच्या अंगणात,गच्चीवर तसेच मंदिरांच्या परिसरात दिव्यांची रोषणाई केली जाते.कुटुंबीय आणि मित्रपरिवार एकत्र येऊन गाणी,गप्पा आणि विविध सांस्कृतिक उपक्रमांत सहभागी होतात.त्यामुळे हा उत्सव धार्मिक विर्धापुरता मर्यादित न राहता सामाजिक स्नेह दृढ करणारा ठरतो.