गडचिरोली जिल्ह्यातील तब्बल ७७ हजार ६६६ चिमुकल्यांना पोलिओचा डोस..

​गडचिरोली :-जिल्ह्यात आज रविवारी राबविण्यात आलेल्या राष्ट्रीय ‘पल्स पोलिओ लसीकरण मोहिमेला’ नागरिकांचा उत्स्फूर्त प्रतिसाद लाभला.आरोग्य विभागाच्या वतीने राबविण्यात आलेल्या या मोहिमेत पहिल्याच दिवशी जिल्ह्यातील तब्बल ७७ हजार ६६६ चिमुकल्यांना पोलिओचा डोस पाजण्यात आला असून,जिल्ह्याचे ९२.५३ टक्के लसीकरणाचे उद्दिष्ट पूर्ण झाले आहे.

​एकूण अपेक्षित लाभार्थी (उद्दिष्ट): ८२ हजार ९८४ बालके

पोलिओ डोस दिलेले प्रत्यक्ष लाभार्थी:

 ७६ हजार ७८९ बालके(० ते ५ वयोगटातील ),५ वर्षावरील- ८७७ असे एकूण- ७७ हजार ६६६ बालकांना पोलिओ डोस देण्यात आला.

जिल्हा माता व बाल संगोपन अधिकारी डॉ.माधव शिंदे यांनी माहिती देतांना सांगितले की,बूथवरील मोहिमेच्या दिवशी जे लाभार्थी कोणत्याही कारणास्तव पोलिओ डोस घेण्यापासून वंचित राहिले आहेत; त्यांच्यासाठी आता ‘आयपीपीआय’ (IPPI) टीममार्फत घरोघरी जाऊन सर्वेक्षण केले जाणार आहे.

​सुटलेल्या बालकांचा शोध घेऊन त्यांना डोस देण्यासाठी विशेष नियोजन करण्यात आले असून त्याची रूपरेषा खालीलप्रमाणे आहे:

​ शहरी भागात: सलग ५ दिवस घरोघरी सर्वेक्षण

 ग्रामीण भागात: सलग ३ दिवस घरोघरी सर्वेक्षण

आरोग्य विभागाच्या टीम घरोघरी जाऊन ‘एकही मूल सुटता कामा नये’ या उद्देशाने लसीकरण पूर्ण करतील.

​लसीकरणासोबतच ‘ताप रुग्ण सर्वेक्षण’ जिल्हा आरोग्य अधिकारी डॉ.प्रताप शिंदे यांनी या मोहिमेबाबत अधिक माहिती देतांना स्पष्ट केले की,घरोघरी जाणाऱ्या या पथकांमार्फत केवळ पोलिओ लसीकरणच केले जाणार नाही,तर या सर्वेक्षणादरम्यान ‘ताप रुग्ण सर्वेक्षण’ देखील केले जाणार आहे.पावसाळ्याच्या पार्श्वभूमीवर साथीच्या आजारांवर नियंत्रण मिळवण्यासाठी हे सर्वेक्षण अत्यंत महत्त्वाचे ठरणार आहे.

• ​ नागरिकांना आवाहन👇

आरोग्य विभागाच्या वतीने सर्व पालकांना आणि नागरिकांना आवाहन करण्यात येत आहे की,पोलिओ लसीकरण आणि ताप सर्वेक्षणासाठी घरोघरी येणाऱ्या आरोग्य कर्मचाऱ्यांना योग्य माहिती देऊन सहकार्य करावे.आपल्या ० ते ५ वर्षे वयोगटातील बालकाला पोलिओचा डोस नक्की पाजा आणि देशाच्या पोलिओमुक्तीच्या लढ्यात आपले योगदान द्या.