२४ वर्षीय तरुणाचा आढळला मृतदेह; गडचिरोली शहरात खळबळ..

गडचिरोली :-एका २४ वर्षीय तरुणाचा संशयास्पद स्थितीत मृतदेह आढळून आल्याने गडचिरोली शहरात एकच खळबळ उडाली आहे.सदरची घटना गडचिरोली शहराच्या धानोरा मार्गावरील शिवाजी महाविद्यालयाच्या समोरील मार्लीवार यांच्या मोकळ्या जागेत आज,रविवार ३ मे रोजी सकाळी सात वाजेच्या सुमारास उघडकीस आली.हरबचनसिंग खन्ना सिंग पटवा वय २४ वर्षे, रा.गोकुळनगर,गडचिरोली असे मृतक तरुणाचे नाव असून मृतदेहाची पाहणी दरम्यान तरुणाच्या नाक,तोंड आणि गुप्तांगातून रक्तस्त्राव झाल्याचे निदर्शनास आल्याने हत्येचा संशय बळावला आहे.

आज सकाळच्या सुमारास कसरत(व्यायाम) करणाऱ्या काही मुलांना मोकळ्या जागेत एकजण झोपलेल्या अवस्थेत दिसून आला.जवळ जाऊन पाहिले असता चेहऱ्यावरील रक्त आणि कुठलीही हालचाल होत नसल्याने नागरिकांनी पोलिसांना पाचारण केले,यावेळेस सदरचा प्रकार लक्षात आला. ओळख पटताच कुटुंबीयांनी घटनास्थळी धाव घेत हत्येचा संशय व्यक्त केला आहे.गडचिरोली पोलिसांनी घटनास्थळाचा पंचनामा करून मृतदेह उत्तरीय तपासासाठी गडचिरोली जिल्हा सामान्य रुग्णालयात पाठवला.विशेष म्हणजे, मृतक तरुणाची दुचाकी चावी लावलेल्या स्थितीत जवळच असल्याने शंका-कुशंका वाढीस लागली आहे. प्रकरणाचा पुढील तपास गडचिरोली पोलिस प्रशासन करीत आहे.