आता दहावीच्या विद्यार्थ्यांना मिळणार परीक्षेचे हॉल तिकीट..

उद्रेक न्युज वृत्त :-महाराष्ट्र राज्य माध्यमिक व उच्च माध्यमिक शिक्षण मंडळातर्फे होणाऱ्या बारावी परीक्षेच्या विद्यार्थ्यांसाठी सोमवार १२ जानेवारीपासून परीक्षेचे हॉल तिकीट(प्रवेशपत्र)उपलब्ध करून देण्यात येत आहेत. अश्यातच आता येत्या,२० फेब्रुवारी ते १८ मार्च २०२६ या कालावधीत होणाऱ्या माध्यमिक शालान्त प्रमाणपत्र (इयत्ता दहावीच्या) परीक्षेसाठी विद्यार्थ्यांची हॉल तिकीटे ऑनलाईन माध्यमातून उद्या,मंगळवार २० जानेवारीपासून उपलब्ध करून देण्यात येणार आहेत. त्यातच,दहावीची प्रॅक्टीकल आणि तोंडी परीक्षा २ फेब्रुवारी ते १८ फेब्रुवारी २०२६ दरम्यान होणार आहे. त्यानुसार,इयत्ता दहावी परीक्षेसाठी बसलेल्या सर्व विद्यार्थ्यांची हॉल तिकीटे संबंधित माध्यमिक शाळांनी मंडळाच्या संकेतस्थळावरून डाऊनलोड करून त्याची प्रिंट काढून विद्यार्थ्यांना उपलब्ध करून द्यायची आहेत. हॉल तिकीट देतांना विद्यार्थ्यांकडून कोणतेही अतिरिक्त शुल्क घेऊ नये.छापील प्रवेशपत्रावर मुख्याध्यापकांनी शिक्का मारून स्वाक्षरी करणे आवश्यक आहे.काही तांत्रिक अडचणी उद्भवल्यास संबंधित शाळांनी आपल्या विभागीय मंडळाशी संपर्क साधावा,असे मंडळाकडून स्पष्ट करण्यात आले आहे.