अखेर लाडक्या बहिणींच्या खात्यात दीड हजार जमा..

उद्रेक न्युज वृत्त :-मुख्यमंत्री माझी लाडकी बहीण योजनेच्या पात्र लाभार्थी महिलांच्या खात्यात अखेर वर्षाच्या अखेरीस नोव्हेंबर महिन्याचे दीड हजार रुपये जमा करण्यात आले आहे.काल बुधवारी सायंकाळी अनेक महिलांच्या खात्यांत दीड हजार रुपयांची रक्कम जमा झाली आहे.विशेष म्हणजे,लाडकी बहीण योजनेचे नोव्हेंबर आणि डिसेंबर या दोन्ही महिन्यांचे हफ्ते प्रलंबित होते.त्यामुळे वर्षअखेर एकत्रित रक्कम मिळेल,अशी आशा लाभार्थ्यांमध्ये होती.मात्र,शासनाने सध्या स्थितीत एकाच महिन्याची रक्कम जमा केली आहे.यामुळे अनेक महिलांचा अपेक्षाभंग झाला आहे. याआधी नोव्हेंबर आणि डिसेंबरचे मिळून तीन हजार रुपये मिळतील,अशी चर्चा होती.त्यातच जानेवारी महिन्याचाही हफ्ता एकत्र दिला जाईल आणि ४ हजार ५०० रुपये खात्यात जमा होतील,असा अंदाज बांधला जात होता.मात्र प्रत्यक्षात केवळ दीड हजार रुपये जमा झाल्याने महिलांमध्ये संमिश्र प्रतिक्रिया उमटत आहेत.वर्षाच्या शेवटी महागाईचा भार वाढलेला असतांना आणि घरगुती खर्च डोईजड झालेला असतांना,अपेक्षेपेक्षा कमी रक्कम मिळाल्याने काही लाडक्या बहिणी नाराज झाल्याचे चित्र आहे.विशेषतः डिसेंबर महिना पूर्ण संपत असतांना फक्त नोव्हेंबरचे पैसे मिळाल्याने सरकारकडून उर्वरित हफ्त्यांबाबत स्पष्टता कधी येणार,असा प्रश्न महिलांकडून उपस्थित केला जात आहे.तरीही,किमान नोव्हेंबरचा हफ्ता खात्यात आल्याने अनेक महिलांनी समाधान व्यक्त केले आहे.