उद्रेक न्युज वृत्त
गडचिरोली :- गडचिरोली जिल्हा हा आदिवासी बहुल,नक्षल प्रभावित मागास म्हणून ओळखला जातो.जिल्ह्यातील विद्यार्थ्यांना उच्च शिक्षणाची सोय व्हावी; यासाठी गडचिरोलीत गोंडवाना विद्यापीठाची निर्मिती करण्यात आली.मागील काही वर्षांच्या कालावधीत विद्यापीठाने विद्यार्थ्यांच्या विकासासाठी विविध उपक्रम राबवून आपली एक वेगळी ओळख निर्माण केली आहे.गोंडवाना विद्यापीठात विकास कामे करण्यासाठी आणि विविध उपक्रम राबविण्यासाठी विद्यापीठाचे एक स्वतंत्र बँक खाते आहे.ज्याद्वारे विविध व्यवहार केले जातात.अशातच नुकतेच विद्यापीठाच्या मुख्य बँक खात्यातून १.४६ कोटी रुपये हडप केल्याचे प्रकरण उघडकीस आल्याने विद्यापीठ प्रशासनासह जिल्ह्यात एकच खळबळ उडाली आहे. गोंडवाना विद्यापीठाच्या बँक खात्यातून कोट्यवधी रुपये हडप झाल्याची बाब उघडकीस येताच; विद्यापीठ प्रशासनाने याची गंभीरतेने चौकशी केली असता,पैसे हडप करणारे विद्यापीठातीलच लिपीक पदावर कार्यरत कर्मचारी असल्याचे निदर्शनास आले.ही बाब स्पष्ट होताच विद्यापीठाचे वित्त व लेखाधिकारी भास्कर पठारे यांनी मंगळवारी सायंकाळी गडचिरोली पोलिस ठाण्यात फिर्याद दाखल केली.पोलिसांनी तक्रार दाखल होताच,गुन्हा दाखल करून महेशकुमार उसेंडी,अमोल रंगारी,अमित जांभुळे व प्रिया पगाडे या चारही कर्मचाऱ्यांना अटक केली आहे.या प्रकरणामुळे विद्यापीठ प्रशासनासह संपूर्ण जिल्ह्यात एकच खळबळ माजली आहे.गोंडवाना विद्यापीठात लिपीक पदावर कार्यरत संबंधित कर्मचाऱ्यांद्वारे मागील दोन वर्षांपासून विद्यापीठाच्या मुख्य बँक खात्यातून पैसे काढले जात होते.कर्मचा-यांनी कधी १० हजार तर कधी १५ हजार रुपये काढले.आतापर्यंत १ कोटी ४६ लाख रुपये हडप केले.या प्रकरणाची सखोल चौकशी केल्यानंतर विद्यापीठाने गडचिरोली पोलिस ठाण्यात तक्रार नोंदवली.
डॉ.प्रशांत बोकारे, कुलगुरु, गोंडवाना विद्यापीठ, गडचिरोली👇
विद्यापीठाच्या वित्त लेखाधिकाऱ्यांनी खात्याची चौकशी सुरू केली असता,संबंधित कर्मचाऱ्यांनी फाइल देण्यास टाळाटाळ करून विलंब केला.त्यामुळे शंका निर्माण झाली.मागील शुक्रवारी रात्री संबंधित अधिकाऱ्याने मला फोन केला.त्यानंतर संबंधित अधिकाऱ्याला फाइल तपासण्याचे आदेश दिले.या संदर्भात रविवारी बैठक घेण्यात आली.सोमवारी वित्त समितीची बैठक घेतली.ज्यामध्ये या प्रकरणी पोलिस ठाण्यात तक्रार करण्याचा निर्णय घेण्यात आला. मंगळवारी गडचिरोली पोलिस ठाण्यात तक्रार करण्यात आली.
