मुख्यमंत्री अन्नपूर्णा योजनेअंतर्गत ३ गॅस सिलेंडर मोफत नाही; तर आधी भरावे लागणार पैसे…

गडचिरोली :-मुख्यमंत्री अन्नपूर्णा योजनेअंतर्गत मुख्यमंत्री लाडकी बहीण योजनेच्या पात्र लाभार्थीच्या कुटुंबाला एका वर्षात ३ गॅस सिलिंडरचे पुनर्भरण मोफत करून दिले जात आहे; परंतु अनेक ठिकाणी गॅस सिलिंडर जोडणी कुटुंबातील पुरुषांच्या नावे असल्याची बाब समोर आली.त्यामुळे राज्य शासनाने त्यात बदल केला आहे. कुटुंबातील पुरुषांच्या नावे असणारी गॅस जोडणी त्याच घरातील महिलेने स्वतःच्या नावावर करून घेतल्यास मुख्यमंत्री अन्नपूर्णा योजनेचा लाभ घेता येणार आहे.राज्यातील लाभार्थीना प्रधानमंत्री उज्ज्वला योजना तसेच मुख्यमंत्री माझी लाडकी बहीण योजनेच्या पात्र लाभार्थीच्या कुटुंबाला एका वर्षात ३ गॅस सिलिंडरचे पुनर्भरण (रिफील) मोफत उपलब्ध करून देण्याचा निर्णय घेण्यात आला. त्यासाठी राज्य शासनाने मुख्यमंत्री अन्नपूर्णा योजना सुरू केली आहे.एका कुटुंबात शिधापत्रिकेनुसार केवळ एक लाभार्थी या योजनेस पात्र असेल.तसेच फक्त १४.२ किलोग्रॅम वजनाच्या गॅस सिलिंडरची जोडणी असलेल्या गॅस ग्राहकांना ही योजना लागू असल्याने जिल्ह्यातील अनेक महिलांना याचा लाभ मिळणार आहे.