शासकीय अधिकारी व कर्मचाऱ्यांसाठी नवीन सेवार्थ प्रणाली लागू.. – ‘डेटा मायग्रेशन’ व पायलट वेतन देयक प्रक्रिया तात्काळ पूर्ण करण्याचे आवाहन.. – सुट्टीच्या दिवशीही कोषागार व उपकोषागार कार्यालये राहणार सुरू..

गडचिरोली :-शासकीय अधिकारी व कर्मचाऱ्यांच्या वेतनाची प्रक्रिया अधिक वेगवान,सुलभ आणि सुरक्षित करण्याच्या उद्देशाने राज्य शासनाच्या वित्त विभागाच्या १ जुलै २०२६ च्या शासन निर्णयानुसार नवीन सेवार्थ प्रणाली लागू करण्यात आली आहे.या प्रणालीच्या प्रभावी अंमलबजावणीसाठी गडचिरोली जिल्ह्यातील सर्व आहरण व संवितरण अधिकारी (DDO),कार्यालय प्रमुख आणि कर्मचाऱ्यांनी जुन्या सेवार्थ प्रणालीतील माहितीचे ‘डेटा मायग्रेशन’ तसेच नवीन सेवार्थ प्रणालीमध्ये जुलै २०२६ महिन्याचे प्रायोगिक वेतन देयक(Pilot Bill) तयार करण्याची प्रक्रिया २० ऑगस्ट २०२६ पूर्वी अनिवार्यपणे पूर्ण करावी,असे आवाहन जिल्हा कोषागार अधिकारी धर्मराव पेंदाम यांनी केले आहे.

नवीन सेवार्थ प्रणालीच्या अंमलबजावणीसाठी जुन्या सेवार्थ प्रणालीमध्ये नोंद असलेल्या सर्व शासकीय अधिकारी व कर्मचाऱ्यांची माहिती आणि सेवा तपशील नवीन पोर्टलवर स्थलांतरित करण्याची(Data Migration)प्रक्रिया सध्या कोषागार कार्यालय स्तरावर युद्धपातळीवर सुरू आहे.त्यामुळे जिल्ह्यातील सर्व आहरण व संवितरण अधिकाऱ्यांनी त्यांच्या अधिनस्त अधिकारी-कर्मचाऱ्यांची माहिती व सेवा तपशील अचूकपणे नवीन प्रणालीमध्ये स्थलांतरित करण्याची कार्यवाही विहित मुदतीत पूर्ण करणे आवश्यक आहे.

संचालनालय,लेखा व कोषागारे,मुंबई यांच्या निर्देशानुसार जुन्या सेवार्थ प्रणालीमध्ये २० ऑगस्ट २०२६ नंतर कोणतेही नवीन कामकाज अथवा बिल निर्मिती करता येणार नाही.त्यामुळे संबंधित कार्यालयांनी अंतिम मुदतीची प्रतीक्षा न करता डेटा मायग्रेशनची कार्यवाही तातडीने पूर्ण करावी.

त्याचबरोबर नवीन सेवार्थ प्रणाली व्यवस्थित कार्यरत असल्याची खात्री करण्यासाठी जुलै २०२६ महिन्याचे वेतन देयक प्रायोगिक स्वरूपात(Pilot Bill Generate)तयार करण्याची प्रक्रिया देखील २० ऑगस्टपूर्वी पूर्ण करणे आवश्यक आहे.या प्रक्रियेमुळे नवीन प्रणालीमध्ये वेतन देयक तयार करतांना येणाऱ्या तांत्रिक किंवा माहितीविषयक त्रुटी वेळेत निदर्शनास आणून त्यांचे निराकरण करणे शक्य होणार आहे.

डेटा मायग्रेशन आणि पायलट देयक तयार करण्यासाठी निश्चित करण्यात आलेल्या कालावधीतच सर्व प्रक्रिया पूर्ण करणे बंधनकारक असून,या कामासाठी कोणत्याही प्रकारची मुदतवाढ दिली जाणार नाही,असे संचालनालय, लेखा व कोषागारे, मुंबई यांनी स्पष्ट केले आहे. त्यामुळे सर्व आहरण व संवितरण अधिकारी, कार्यालय प्रमुख तसेच संबंधित कर्मचाऱ्यांनी या बाबीची गांभीर्याने नोंद घेऊन आवश्यक कार्यवाही प्राधान्याने पूर्ण करावी.

नवीन सेवार्थ प्रणालीतील डेटा मायग्रेशन व पायलट वेतन देयकाची प्रक्रिया विहित कालावधीत पूर्ण करता यावी आणि संबंधित कार्यालयांना आवश्यक सहकार्य व मार्गदर्शन उपलब्ध व्हावे यासाठी जिल्ह्यातील सर्व कोषागार व उपकोषागार कार्यालये सुट्टीच्या दिवशीही सुरू राहणार आहेत.

सर्व आहरण व संवितरण अधिकाऱ्यांनी नवीन सेवार्थ प्रणालीतील डेटा मायग्रेशन आणि पायलट देयक तयार करण्याचे काम २० ऑगस्ट २०२६ पूर्वी पूर्ण करून कोषागार प्रशासनास सहकार्य करावे,असे आवाहन जिल्हा कोषागार अधिकारी धर्मराव पेंदाम यांनी केले आहे.