मुलगी आयएएस झाल्याचा आनंदोत्सव साजरा करतांना वडिलांना हृदयविकाराचा झटका..

यवतमाळ :-आपल्या मुलीने मोठे अधिकारी व्हावे,अशी स्वप्ने रंगवू पाहणाऱ्या वडिलांची इच्छा मुलीने पूर्ण केली. त्यासाठी घरी मोठी पार्टी आयोजित करण्यात आली. अशातच मुलगी आयएएस झाल्याचा आनंदोत्सव साजरा करतांनाच वडिलांना हृदयविकाराचा तीव्र झटका आला. झटका येताच उपस्थित नातेवाईकांनी खासगी रुग्णालयात दाखल केले.मात्र,तोपर्यंत प्राणज्योत मावळली.प्रल्हाद खंदारे असे हृदयविकाराच्या झटक्याने मृत्यू झालेल्या वडिलांचे नाव आहे.खंदारे हे पुसद पंचायत समितीचे सेवानिवृत्त विस्तार अधिकारी होते.सदरची घटना यवतमाळ जिल्ह्याच्या महागाव तालुक्यातील वागद ईजारा येथे घडली असून घटनेने ऐन आनंदोत्सवावर दुःखाचे सावट पसरले आहे.

नुकताच यूपीएससी परीक्षेचा निकाल जाहीर झाला. त्यात प्रल्हाद खंदारे यांची मुलगी मोहिनी हिची केंद्रीय लोकसेवा आयोगाच्या(यूपीएससी)परीक्षेत चांगल्या गुणांनी उत्तीर्ण होऊन आयएएस अधिकरी म्हणून निवड झाली.मुलगी चांगल्या गुणांनी उत्तीर्ण होऊन आयएएस अधिकारी झाल्याचा आनंदोत्सव खंदारे परिवाराकडून साजरा केला जात असतांनाच प्रल्हाद खंदारे यांना हृदयविकाराचा झटका आला.त्यानंतर नातेवाईकांनी त्यांना तात्काळ खासगी रुग्णालयात उपचारासाठी दाखल केले.परंतु डॉक्टरांनी तपासून त्यांना मृत घोषित केले.सदरच्या घटनेने खंदारे कुटुंबियांवर मोठा आघात झाला आहे.