आमदार रामदास मसराम यांची टीआरटीआय आयुक्तांशी जात पडताळणी प्रकरणांवरील अडचणींवर सखोल चर्चा..

गडचिरोली :-जिल्ह्याच्या आरमोरी विधानसभा क्षेत्राचे आमदार रामदास मसराम यांनी पुण्याचे तत्कालीन आदिवासी संशोधन व प्रशिक्षण संस्थेचे (TRTI)आयुक्त डॉ.राजेंद्र भारूड(IAS)यांची गडचिरोली येथील शासकीय विश्रामगृहात सदिच्छा भेट घेतली.यावेळी गडचिरोली जिल्ह्यातील अनुसूचित जमाती प्रवर्गातील नागरिकांना जात पडताळणी प्रमाणपत्र मिळवितांना येणाऱ्या विविध गंभीर अडचणींबाबत सविस्तर चर्चा केली.

गडचिरोली जिल्हा हा भौगोलिकदृष्ट्या विस्तीर्ण असून अनेक दुर्गम व आदिवासी भागांमध्ये इंटरनेट व दळणवळणाच्या सुविधांचा अभाव आहे.परिणामी, अनेक समाजबांधवांकडे अद्याप जात वैधता प्रमाणपत्र नसून शिक्षण,नोकरी व विविध शासकीय योजनांपासून ते वंचित राहण्याची परिस्थिती निर्माण होत आहे,अशी बाब आमदार मसराम यांनी निदर्शनास आणून दिली.तसेच जात पडताळणी समिती कार्यालयातील अधिकारी व कर्मचाऱ्यांचे सातत्याने होणारे स्थलांतरण,तसेच त्यासाठी वापरण्यात येणारे आधार चुकीचे असून सध्या १६९ पेक्षा अधिक प्रकरणे प्रलंबित असल्याची माहिती देण्यात आली.अशा परिस्थितीत अधिकारी-कर्मचाऱ्यांचे स्थलांतरण झाल्यास प्रकरणे अधिक काळ प्रलंबित राहण्याची शक्यता असल्याबाबत चिंता व्यक्त करण्यात आली.या सर्व बाबींची दखल घेऊन गडचिरोली जिल्ह्यातील अनुसूचित जमाती बांधवांना दिलासा मिळावा,प्रलंबित प्रकरणांचा जलद निपटारा व्हावा व योग्य उपाययोजना राबवाव्यात,यासाठी आमदार रामदास मसराम यांनी आयुक्त डॉ.राजेंद्र भारूड यांच्याशी सकारात्मक चर्चा करून प्रयत्न करण्याची मागणी केली.