अल्पवयीन विद्यार्थिनींशी गैरवर्तन करणाऱ्या शिक्षकास पाच वर्षाचा कारावास..

गडचिरोली :-जिल्ह्याच्या भामरागड तालुक्यातील कुकामेटा येथील जिल्हा परिषद प्राथमिक शाळेतील पाच अल्पवयीन विद्यार्थिनींशी गैरवर्तन केल्याची घटना घडली होती.या प्रकरणी ४३ वर्षीय शिक्षक तथा मुख्याध्यापक रवींद्र उस्तुजी गव्हारे यास न्यायालयाने ५ वर्षांचा सश्रम कारावास आणि विविध कलमान्वये ७० हजार रुपयांच्या दंडाची शिक्षा सुनावली.सदरचा निकाल हा अहेरीच्या अप्पर जिल्हा सत्र न्यायालयाने काल गुरुवारी दिला. विद्यार्थिनींशी गैरवर्तन केल्याचा प्रकार मार्च २०२५ मध्ये कुकामेटा येथील एकशिक्षकी शाळेत घडला होता.गव्हारे हा तिसरी ते पाचवीच्या वर्गात शिकणाऱ्या ९ ते ११ वर्षे वयोगटातील विद्यार्थिनींना आपल्या कक्षात एकट्याने बोलावून त्यांच्याशी लैंगिक गैरवर्तन करीत असल्याचे तपासात समोर आले.हा प्रकार कोणाला सांगितल्यास मारहाण करण्याची तसेच शाळेतून काढून टाकण्याची धमकी तो विद्यार्थिनींना देत होता.दरम्यान,दोन सख्ख्या बहिणींनी शाळेत जाण्यास नकार दिल्यानंतर त्यांच्या आईने कारण विचारले.त्यावेळी घाबरलेल्या मुलींनी रडत-रडत आपल्यासोबत घडलेला प्रकार सांगितला होता.त्यानंतर,मुलींच्या आईने लाहेरी उपपोलीस ठाण्यात तक्रार दाखल केली. तपासादरम्यान शाळेतील आणखी काही विद्यार्थिनींसोबतही अशाच प्रकारचे गैरवर्तन झाल्याचे समोर आले.त्यानंतर पोलिसांनी गव्हारे याच्याविरुद्ध विविध कलमांन्वये गुन्हा दाखल करून त्याला अटक केली होती.दरम्यान,भामरागडचे तत्कालीन उपविभागीय पोलीस अधिकारी अमर मोहिते यांनी या प्रकरणाचा तपास केला.न्यायालयात सादर करण्यात आलेले साक्षीदार आणि पुराव्यांच्या आधारे आरोपी मुख्याध्यापक रविंद्र गव्हारे याला भारतीय न्याय संहितेच्या कलम ७४ अंतर्गत ५ वर्षांचा कारावास आणि २५ हजार दंड,कलम ७५(२)अंतर्गत ३ वर्षांची शिक्षा व २५ हजार दंड,धमकी दिल्याप्रकरणी बीएनएस कलम ३५१(२)(३)अंतर्गत २ वर्षांची शिक्षा,तर अनुसूचित जाती-जमाती अत्याचार प्रतिबंधक कायद्यानुसार ३ व २ वर्षांची शिक्षा तथा २० हजार रुपयांचा दंड अशी शिक्षा सुनावली.विशेष म्हणजे,न्यायालयाने सुनावलेल्या विविध शिक्षांपैकी आरोपीला एकूण ५ वर्षाची शिक्षा व ७० हजार रुपयांचे दंड अशी शिक्षा भोगावी लागणार आहे.