विमानतळावर पाच कोटी रुपयांचे पाच किलो ड्रग्ज जप्त..

नागपूर :-कतार एअरवेजच्या दोहा-नागपूर फ्लाइट क्रमांक- क्यूआर ५९० मधून आलेल्या एका प्रवाशाजवळ तब्बल पाच कोटी रुपयांचे पाच किलो ‘हायड्रोपोनिक मारिजुआना’ प्रतिबंधित ड्रग्ज नागपूरच्या डॉ.बाबासाहेब आंबेडकर आंतरराष्ट्रीय विमानतळावर जप्त करण्यात आल्याने विमानतळावर एकच खळबळ उडाली.सदरची कारवाई डीआरआय(डायरेक्टोरेट ऑफ रेव्हेन्यू इंटेलिजन्स)आणि कस्टम्सच्या विशेष इंटेलिजन्स व एसआयआयबी(इव्हेस्टिगेटिव्ह ब्रँचने)संयुक्तरीत्या केली असून डीआरआयला मिळालेल्या गोपनीय माहितीच्या आधारे विमानतळावर एका प्रवाशाची सखोल तपासणी करण्यात आली.तपासणीत त्याच्या बॅगेतून सुमारे पाच किलो ड्रग्ज आढळले.याची किंमत आंतरराष्ट्रीय बाजारात सुमारे पाच कोटी रुपये इतकी आहे.

आरोपीने ड्रग्जची खेप ही थायलंडची राजधानी बँकॉक येथून घेतली होती.त्यानंतर तो उझबेकिस्तानची राजधानी ताश्कंद,तेथून दोहा आणि शेवटी नागपूर येथे आला. पकडण्यात आलेले ड्रग्ज चरस,गांजा आणि भांगपेक्षा अधिक प्रभावी असून त्याचा मानवी मेंदूवर झपाट्याने परिणाम होतो.हे ड्रग्ज प्रामुख्याने आग्नेय आशियाई देशांत तयार केले जाते. रेव्ह पार्टीत ‘हाय-क्लास ड्रग्ज’ म्हणून या पदार्थाला मोठी मागणी असते.या घटकात ‘टेट्राहायड्रोकॅनाबिनोल'(टीएचसी)चे प्रमाण साध्या गांजापेक्षा अधिक असल्याने नशेचे सेवन करणारे यास अधिक पसंती देतात.हायड्रोपोनिक शेती म्हणजे मातीऐवजी पाण्यात पोषकतत्त्वे देऊन झाडे वाढविण्याची आधुनिक पद्धती.या तंत्रात उगवलेले ‘हायड्रोपोनिक मारिजुआना’ साध्या गांजापेक्षा अधिक तीव्र आणि जलद नशा देणारे असते.त्यात टेट्राहायड्रोकॅनाबिनोल चे प्रमाण जास्त असल्याने मेंदूवर थेट परिणाम होतो.त्यामुळे हे ड्रग्ज अत्यंत धोकादायक आणि व्यसनकारक मानले जाते.