दिल्लीत भूकंपाचे हादरे; नागरिक घराबाहेर निघाले..

नवी दिल्ली :-दिल्लीत आज,सोमवार १७ फेब्रुवारीला सकाळी ५ वाजून ३६ मिनिटांनी भूकंपाचे जोरदार हादरे जाणवल्याने नागरिक भयभीत होऊन घराबाहेर पडले.भूकंपाची तीव्रता ४.० रिश्टर स्केलवर असल्याचे राष्ट्रीय भूकंप विज्ञान केंद्राने म्हटले आहे. याचे केंद्र दिल्लीच्या जवळ जमिनीपासून ५ किमी खोल होते.यामुळे याचे धक्के अधिक जाणवले.काही सेकंदापर्यंत जमीन हलत राहिल्याने इमारतींच्या आतमध्ये जोरदार कंपन जाणवले असल्याचे नागरिकांचे म्हणणे आहे.त्यातच दिल्लीसह जवळपासच्या परिसरातही भूकंपाचे धक्के जाणवले.

पंतप्रधान मोदींनी सोशल मीडियाच्या एक्सवर पोस्ट करत लोकांना सावधानता बाळगण्याचे आवाहन केले.दिल्ली आणि जवळच्या परिसरात भूकंपाचे झटके जाणवल्याने सर्वांना शांत राहण्याचे तसेच योग्य ती सुरक्षा बाळगण्याचे आवाहन केले.अधिकारी परिस्थितीवर लक्ष ठेवून आहेत,असे त्यांनी म्हटले.

अधिकाऱ्यांनी एका वृत्तसंस्थेला दिलेल्या माहितीनुसार भूकंपाचा केंग्र धौला कुआंमध्ये दुर्गाबाई कॉलेज ऑफ स्पेशल एज्युकेशनजवळ होता.जिथे भूकंपाचा केंद्रबिंदू होता तेथे एक नाला आहे.या परिसरात दर दोन ते तीन वर्षात एखादा लहान आणि कमी तीव्रतेच्या भूकंपाचे झटके बसत असतात. २०१५ मध्ये येथे ३.३ रिश्टर स्केल तीव्रतेचा भूकंप झाला होता.